Рөстәм Галиуллин
Рөстәм Галиуллин, Рөстәм Госман улы Галиуллин (1987 елның 26 ноябре, СССР, РСФСР, ТАССР, Арча районы, Наласа) — язучы, филология фәннәре кандидаты (2012). 2018 елдан «Казан утлары» журналының баш мөхәррире. «Идел» журналы баш мөхәррире (2011—2014), ТР ФА Тел, әдәбият һәм сәнгать институтының өлкән фәнни хезмәткәре, гыйльми сәркатибе (2015—2018). Татарстан Республикасының журналистлар (2009 елдан) һәм язучылар (2009 елның 22 сентябреннән) берлекләре, халыкара ПЕН-клуб әгъзасы. Муса Җәлил премиясе лауреаты (2015).
| Рөстәм Галиуллин | |
|---|---|
 | |
| Тугач бирелгән исеме: | Рөстәм Госман улы Галиуллин |
| Туу датасы: | 26 ноябрь 1987 (36 яшь) |
| Туу урыны: | СССР, РСФСР, ТАССР, Арча районы, Наласа |
| Милләт: | татар |
| Ватандашлык: |  СССР РФ |
| Эшчәнлек төре: | язучы, галим |
| Иҗат итү еллары: | 2005 — х. в. |
| Юнәлеш: | проза |
| Иҗат итү теле: | татар теле |
| Дебют: | «Гипнозчы малай» китабы (2008, ТКН) |
| Премияләр: | Муса Җәлил премиясе |
Тәрҗемәи хәле үзгәртү
1987 елның 26 ноябрендә Татарстан АССР Арча районы Наласа авылында укытучылар гаиләсендә туган. Наласа урта мәктәбен, Казан дәүләт университетының татар филологиясе һәм тарихы факультетын кызыл дипломга (2009), КДУ аспирантурасын тәмамлаган. «Тәүфикъ Әйди иҗаты: жанр типологиясе һәм образлар корылышы» (Творчество Тауфика Айди : жанровая типология и система образов) темасына филология фәннәре кандидатлыгына диссертация яклаган (2012, фәнни җитәкчесе проф. Т. Н. Галиуллин)[1].
Хезмәт юлы үзгәртү
КДУда укыган вакытта ук «Чаян» журналында, «Шәһри Казан» газетасында эшли.
- 2008—2010 елларда — «Шәһри Казан» газетасында хәбәрче, бүлек мөхәррире.
- 2010 елның 1 ноябреннән — «Казан утлары» журналының бүлек мөхәррире.
- 2011 елның 16 декабреннән 2014 елның ноябренә кадәр — «Идел» журналының баш мөхәррире.
- 2015—2018 елларда Татарстан фәннәр Академиясенең Тел, әдәбият һәм сәнгать институтында өлкән фәнни хезмәткәр, гыйльми сәркатип вазыйфасын башкара[2].
- 2018 елның гыйнварыннан «Казан утлары»[3] журналының баш мөхәррире.
Иҗаты үзгәртү
Казан дәүләт университетында укыган елларда «Әллүки» әдәби-иҗат берләшмәсенә йөри һәм иҗат дөньясына тартыла. 2005 елдан юморескалары, хикәяләре «Сабантуй» газетасында, «Чаян» журналында, соңрак «Казан утлары», «Идел», «Мәйдан» журналларында, «Шәһри Казан», «Ватаным Татарстан», «Мәдәни җомга», «Татар дөньясы» (Мәскәү) газеталарында басыла.
2008 елда беренче китабы — «Гипнозчы малай» (Казан: ТКН) дөнья күрә.
Хикәяләре рус телендә «Литературная газета», "Аврора", «Татарский мир», «Наш современник», «Чолбон» (Якутия), башкорт телендә «Шоңкар» (Башкортстан), «Агыйдел» (Башкортстан), кыргыз телендә «Ала-Тоо» (Кыргызстан) һ. б. басмаларда басыла.
Татарстан китап нәшриятында басылган Тәүфикъ Әйдинең дүрттомлык «Сайланма әсәрләре»н (2015), «Шәхесләребез» сериясендә дөнья күргән «Таҗетдин Ялчыгол: тарихи-документаль җыентыгы»н (2019) һ. б. фәнни һәм фәнни-популяр китаплар, җыентыкларны төзүчеләрнең берсе. Аның тәрҗемәсендә В. Аксеновның «Ленд-лиз балалары» (2016, Татарстан китап нәшрияты) һәм А. Егинның «Үзбәк хан» романнары (2016) аерым китап булып чыккан. Айдар Сәхибзадәнең «Апологет» (2008), Рауль Мир-Хәйдәровның «Мартук» (2009), «Җәяүле сәйран» (2010), «Җәяүле татар» (2011), «Диңгез аша ялгыз» (2013), Салават Юзеевның «Үлгәннәрне бүлдермә» (2012), Рөстәм Вәлиевнең «Дөнья гаме» (2016) һ. б. авторларның роман-повестьлары аның тәрҗемәсендә төрле журнал-газеталарда басылган.
Рөстәм Галиуллин әсәрләре инглиз, төрек, казакъ, кыргыз, азәрбәйҗан, рус, саха, башкорт һ. б. телләргә тәрҗемә ителеп, дөнья күргән.
2015 елда саха милли батыры Гыйззәтулла Рәхмәтуллин турында «Боссоойко» хикәясен язган. Хикәяне русчага Наил Ишмухаметов, саха теленә Данил Макеев тәрҗемә иткән[4] Хикәя «Чолбон» журналында һәм «Саха сирэ» газетасында якут телендә, республикада нәшер ителә торган «Полярная звезда» журналында рус телендә басылып чыккан[5].
2016 елда «Ата hәм ул» белән «Дивана» хикәяләре «Россия халыкларының бүгенге прозасы» антологиясенә тәкъдим ителгән[6].
Татарстан китап нәшриятында басылып чыккан «Гипнозчы малай» (2008), «Юлларда җил ак иде...» (2012) һәм «Васыять» (2017),«Биш«икеле» (2021), Мәскәүдә рус телендә дөнья күргән «Одиночество» (2013), Уфада башкорт телендә басылыып чыккан «Гипнозсы малай» («Гипнозчы малай», 2021), Бакуда чыккан «Ata və oğul» (2020) проза китаплары, «Тәүфикъ Әйди иҗаты: образлар системасы һәм жанр типологиясе» монографиясе (2016) авторы.
2023 елның 21 апрелендә Г. Камал исемендәге Татар Дәүләт академия театрында Рөстәм Галиуллин пьесасы буенча Фәрит Бикчәнтәев сәхнәләштергән «Көзге кайтаваз» спектакленең премьерасы булган. Әлеге пьеса «Яңа татар пьесасы 2022» конкурсында Татарстан Республикасы Мәдәният министрлыгының махсус премиясенә лаек була.
Бүләкләре, мактаулы исемнәре үзгәртү
- 2006 — «Иделем акчарлагы» бәйгесендә I урын.
- 2007 — «Иделем акчарлагы» бәйгесендә Гран-при.
- 2007 — Арча районы якташлыгы җәмгыяте премиясе.
- 2009 — «Бәллүр каләм» бәйгесе җиңүчесе («Дебют» номинациясендә).
- 2009 — Гариф Ахунов премиясе (Арча районы).
- 2009 — ТР хөкүмәте гранты.
- 2011 — ТР яшьләр, спорт һәм туризм министрлыгы һәм ТР татар-башкорт көрәше федерациясе уздырган әдәби конкурста III урын («Чәчмә әсәр» номинцаиясендә).
- 2015 — Муса Җәлил премиясе — «Юлларда җил ак иде» китабы һәм татар әдәбиятын үстерүгә керткән хезмәте өчен[7][8].
- 2017 — ТР Авыл хуҗалыгы һәм азык-төлек министрлыгы уздырган әдәби конкурста "«Дәвам»" хикәясе өчен 1 нче урын.
Гаиләсе үзгәртү
Хатыны Эльвира, улы Ирхан, кызы Камилә.
Искәрмәләр үзгәртү
- ↑ Диссертациясе турында
- ↑ ТР ФА ТӘһСИ сайты
- ↑ «Казан утлары» журналының яңа баш мөхәррире билгеле. «[[Татар-информ]]» мәгълүмат агентлыгы, 16.12.2017, archived from the original on 2017-12-21, retrieved 2018-01-02
- ↑ БОССООЙКО (Кэпсээн). Эдэрсаас(саха.)
- ↑ Якутиядә Гыйззәтулла Рәхмәтуллин-Боссоойкога истәлек тактасы ачтылар. Татар-информ, 23.06. 2022
- ↑ [[Татар-информ]], 15.11.2016, archived from the original on 2016-11-18, retrieved 2017-01-17
- ↑ Каз@нские истории, 13.11.2015
- ↑ «Калеб» иҗади төркеме сайты(үле сылтама)
Әдәбият үзгәртү
- Рәшит Галләм һ.б. Гасырларны кичкән Наласа (мөхәррир-төзүче Исрафил Насыйбуллин). Казан: Ихлас, 2012
- Ак юл. Яшь язучылар иҗаты (төзүчеләр Р. Зәйдулла, В. Нуриев). Казан: «Идел-Пресс» ПНК, 2012. ISBN 978-5-4428-0003-6