Төп менюны ачу

Тәүфикъ Әйди (чын исеме Тәүфикъ Рамазан улы Әйделдинев) — татар язучысы, прозаик, публицист. Татарстанның атказанган мәдәният эшлеклесе, танылган язу­чы, «Йөртә безне язмыш­лар», «Кардәшләр кочагында», «Ягымлы моңнар» һәм башка әсәрләр авторы.

Тәүфикъ Әйди
Taufiq aidi.jpg
Туган телдә исем Тәүфикъ Рамазан улы Әйделдинев
Туган 1 май 1941(1941-05-01)
Туголесски-Бор[d], Кривандино районы[d], Мәскәү өлкәсе, РСФСҖ, ССҖБ
Үлгән 2 апрель 2001(2001-04-02) (59 яшь)
Казан
Яшәгән урын Вишневски урамы, Казан[1]
Милләт татар
Әлма-матер Алабуга мәдәният һәм сәнгать көллияте
Һөнәре язучы, публицист

Ул 1941 елның 1 маенда Мәскәү өлкәсенең Кривандино районы Туголеевский Бор бистәсендә туа.

Бала һәм үсмер чагы Татарстанның Апас районы Түбән Балтай (1941—51; 1955—57), Олы Бакырчы (1954), Омск өлкәсенең Азов районы Төк (1951—53) авылларында уза. Татарстанда — татар, Себердә казакъ мәктәпләрендә укып, җиде класс белем алгач, 1957 елдан 1960 елга кадәр Алабуга китапханә техникумында укый, аннары өч ел Апас районының Урта Балтай авылында китапханә мөдире, 1962 елда Казанга килеп, төзелештә — ташчы, милисә бүлегендә — бригадир, «Оргсинтез» берләшмәсендә—слесарь һәм аппаратчы, мәктәптә — укытучы, Татарстан халык иҗат йортында — методист, газета-журнал редакцияләрендә — әдәби хезмәткәр һәм Татарстан Язучылар берлеге идарәсендә әдәби консультант булып эшли. 1973 елда, читтән торып укып, Казан дәүләт университетының татар теле һәм әдәбияты бүлеген тәмамлый. 1983—1985 елларда ул Мәскәүдә СССР язучылар берлеге каршындагы ике еллык Югары әдәби курсларда укый. 1985-1997 елларда «Казан утлары» журналы редакциясенең проза бүлеген җитәкли, 1997-1998 елларда «Татарстан» журналы баш мөхәрриренең урынбасары, 1998-2001 елларда «Аваз» исемле хосусый нәшриятның башкаручы директоры булып эшли.

Язучы 2001 елның 2 апрелендә Казанда вафат була. Кабере Әлдермеш авылы зиратында.

ЧыганакҮзгәртү