Гомәр Бакиров

Гомәр Бакиров, Гомәр Әхмәт улы Бакиров, рус. Бакиров Гумер Ахметович (1904-1996) — сәясәтче, КПСС Тәкәнеш район комитетының беренче сәркатибе (1935), ТАССР халык мәгарифе халык комиссары (1937). 1924 елдан РКП (б) әгъзасы (1922 елдан намзәт).

Гомәр Бакиров
Файл:.jpg
Туган телдә исем	Гомәр Әхмәт улы Бакиров
Туган	15 февраль 1904(1904-02-15) Казан губернасы Чистай
Үлгән	28 март 1996(1996-03-28) (92 яшь) Казан
Яшәгән урын	Журналистлар урамы[d], Казан
Милләт	татар
Ватандашлыгы	Русия империясе Русия империясе→ РСФСР РСФСР→ ССРБ ССРБ→ Россия Россия
Һөнәре	фирка-хуҗалык хезмәткәре

Тәрҗемәи хәле

1904 елның 15 фералендә Казан губернасы Чистай шәһәрендә йөкче гаиләсендә туган . 8 яшендә әтисез калган. Татар мәдрәсәсенең 5 сыйныфын тәмамлагач, өч бала белән тол калган әнисенә ярдәм итү өчен, 13 яше дә тулмаган килеш пекарняга икмәк пешерүче ярдәмчесе булып эшкә урнаша. 1918 елга хәтле шунда эшли. 1918-1919 елларда Чистай өязендә чыгучы «Берлек» газетасын (мөхәррире Кирам Хәмзин) таратучы экспедитор булып тора. 1919-1921 елларда коммунистик отряд сугышчысы. Н.К. Крупская «Красная Звезда» агитпоезды белән Чистайга килгәч, аны озатып йөри һәм шәхси куркынычсызлыгын тәэмин итә. Чистай өязендә «Каракош» фетнәсе башлангач, фетнәне бастыруда корал тотып катнаша.

• 1922 елда шура-фирка мәктәбен тәмамлагач, Чаллы кантонына ачлык чорында таркалган комсомол оешмаларын тергезергә җибәрелә.
• 1923-1926 елларда Татарстан коммунистик университетында (ТКУ) укый.
• 1926-1933 елларда Чистай шәһәрендә төрле вазифаларда эшли: шура-фирка мәктәбендә укытучы, Чистай педагогия техникумы директоры.
• 1933 елда ВКП (б) Чистай район комитетының пропаганда бүлеге мөдире.
• 1933 елның ахырында Балтач МТСының сәяси бүлек башлыгы итеп раслана.
• 1935 елда КПСС Тәкәнеш район комитетының беренче сәркатибе.
• 1937 елда ТАССР халык мәгарифе халык комиссары.

Сәяси золым

1938 елның гыйнварында кулга алына. «Колхоз строен таркату сәясәте алып бару, наданлыкны бетерү буенча эшне тоткарлау, укытучылар арасында халык дошманнарын яшереп калдыруда» гаепләнә. Очраклылык коткарып кала: эчке эшләр халык комиссары Ежовны аткач, репрессияләр сүрелеп тора, җинаять эшләренең кайберләре яңадан карала, 5 000 гә якын тоткын азат ителә — шушы дулкынга Г. Бакиров та эләгә. Сак астыннан 1939 елның августында чыгаралар.

• 1940-1941 елларда Казан сәнгать училищесы директоры.
• Бөек Ватан сугышы башлангач, Казан шәһәр шурасы каршындагы көнбатыш районнардан эвакуацияләнеп килүче халыкны урнаштыру пункты башлыгы. Кыска гына вакыт эчендә 100 меңнән артык кеше кабул ителеп урнаштырыла.
• 1942-1948 елларда оборона заводы базасы башлыгы.
• 1948-1954 елларда Казан киез итек фабрикасы тәэминат бүлеге башлыгы, ТАССР җирле сәнәгать министрлыгында идарәче.
• 1954-1961 «Казангоргаз» трестында диспетчерлык-авария хезмәте башлыгы, җиһазларны ремонтлау остаханәсе мөдире.

Чыганаклар

1. Татар энциклопедиясе. Т.3. Казан, 2012.

Әдәбият

1. Мухарямов М.К. Октябрь и национальный вопрос в Татарии (октябрь 1917 – июль 1918). Казань, 1958.
2. Борцы за счастье народное. Казань, кн. 1, 1967, кн. 2, 1983.
3. Хаклык аклаган исемнәр. Казан, 1991.ISBN 5-298-00652-3

Сылтамалар

• Г.Ә. Бакиров Хәтер китабы сайтында