Мөслим политехника техникумы
Мөслим политехника техникумы, «Мөслим политехника техникумы» дәүләт автоном һөнәри белем бирү учреждениесе (рус. Муслюмовский политехнический техникум), 1977—2013 елларда 94нче санлы Мөслим һөнәри лицее — Татарстанның Мөслим районы үзәге Мөслим авылында урнашкан һөнәри белем бирүче махсус урта уку йорты.
| Мөслим политехника техникумы | |
|---|---|
| Элеккеге исемнәр | 94нче санлы Мөслим һөнәри лицее Бөгелмә аграр көллиятенең 2нче санлы филиалы Сарман аграр көллияте филиалы |
| Нигезләү елы | 1968 |
| Урын |   Мөслим |
| Адрес | 423970 ТР Мөслим районы, Мөслим авылы, Яшьләр урамы, 15нче йорт |
| Сайт | edu.tatar.ru/muslum |
2013—2015 елларда — Бөгелмә аграр көллиятенең 2нче санлы филиалы, 2015—2019 елларда — Сарман аграр көллияте филиалы.
Гамәлгә куючы — ТР мәгариф һәм фән министрлыгы.
Техникум директоры (2019 елдан) — Илнар Дөлфәрит улы Миргалимов.
Тарих
үзгәртү1968 елда, авыл хуҗалыгы өчен белгечләр хәзерләү максатында, Бөгелмә, аннары Яр Чаллы авыл һөнәри-техник укуханәсенең филиалы буларак эшли башлый. Филиал мөдире Сәяр Фәрхетдинов була. 1977 елдан — мөстәкыйль уку йорты. 1977-1984 елларда әлеге уку йортын Илфат Нуриәхмәт улы Юнысов җитәкли. Баштагы елларда уку-укыту сыйныфлары төрле биналарда урнаша, ныклы базасы булмый. Шул сәбәпле Мөслим районы авылларында күмәк хуҗалык һәм совхозлар базасында уку йортының филиаллары ачыла. 1973-1983 елларда андый филиаллар «Урал», «Кызыл Октябрь», Киров исемендәге, Карл Маркс исемендәге, Куйбышев исемендәге, «Урожай» күмәк хуҗалыкларында, «Трудовик» тәҗрибә-җитештерү хуҗалыгы, «Михайловка» совхозы базаларында эшли. Аларда сыер савучылар, дуңгыз карау операторлары, III класслы тракторчы-машинистлар хәзерләнә. Укучыларны күмәк хуҗалыкларның зоотехниклары, агрономнары, инженерлары укыта.
1984-1989 елларда уку йортын Наил Мөхәммәтулла Сафин, 1989 елдан Рамил Ягъфәр улы Шәмсиев җитәкли.
1999-2000 уку елында 4 катлы яңа бина төзелә. Ел саен 130-140 укучы һөнәр һәм гомуми урта белем алып чыга.
ТР МКның 2018 елның 29 октябрендәге № 954 карары белән Сарман аграр көллиятенең Мөслимдәге филиалы бетерелеп, аның базасында мөстәкыйль юридик зат — Мөслим политехника техникумы оештырыла[1].
Белгечлекләр
үзгәртү2017-2018 уку елына Сарман аграр көллиятенә (Мөслим филиалы белән) ТР мәгариф һәм фән министрлыгы фәрманы[2] буенча 190 студент кабул ителә.
Мөслим филиалында
үзгәртү- Авыл хуҗалыгы җитештерүе тракторчы-машинисты (слесарь, тракторчы-машинист, машина йөртүче)
- Эретеп ябыштыручы (электр һәм газ белән эретеп ябыштыручы)
- Аш-су остасы, кондитер (аш-су остасы, кондитер)[3]
Чыганаклар
үзгәртү- Татарский энциклопедический словарь. Казань: Институт татарской энциклопедии АН РТ, 1999. ISBN 0-9530650-3-0
Әдәбият
үзгәртү- Ә. Ә. Әхмәтгалиев. Мөслим төбәге. Тарихи сәхифәләр. Чаллы: «Яр Чаллы типографиясе» ДУП, 2003.
Сылтамалар
үзгәртү- Мөслим политехника техникумының «Татарстан Республикасында электрон мәгариф» порталындагы сәхифәсе 2019 елның 30 сентябрь көнендә архивланган.
- Профессиональное училище-94
Искәрмәләр
үзгәртү- ↑ Мөслим политехника техникумы оештыру турында ТР МК карары. 2021 елның 17 апрель көнендә архивланган. Татарстан Республикасының хокукый мәгълүмат рәсми порталы
- ↑ ТР мәгариф һәм фән министрлыгы фәрманы № 2405/16 19.12.2016
- ↑ 2015 елның 13 ноябрендә бирелгән 7456нчы санлы лицензия буенча(үле сылтама)