Зөфәр Дәүләтов
Зөфәр Дәүләтов, Зөфәр Мирхәйдәр улы Дәүләтов (1953 елның 15 июне, СССР, РСФСР, ТАССР, Мөслим районы, Яңа Сәфәр) ― төзүче-инженер, шагыйрь, язучы, 2003 елдан Татарстан Язучылар берлеге әгъзасы, 2003―2006 елларда Әлмәт язучылар оешмасы җитәкчесе (җаваплы секретаре). 2002―2012 елларда БТК Әлмәт бүлекчәсе җитәкчесе. ТР атказанган мәдәният хезмәткәре (2006). Рафаил Төхфәтуллин премиясе лауреаты (2012).
| Зөфәр Дәүләтов | |
|---|---|
 | |
| Тугач бирелгән исеме: | Зөфәр Мирхәйдәр улы Дәүләтов |
| Туу датасы: | 15 июнь 1953 (71 яшь) |
| Туу урыны: | СССР, РСФСР, ТАССР, Мөслим районы, Яңа Сәфәр |
| Милләт: | татар |
| Ватандашлык: |  СССР→ РФ |
| Эшчәнлек төре: | инженер, язучы |
| Иҗат итү еллары: | 2001―х. в. |
| Юнәлеш: | шигърият, проза, публицистика |
| Жанр: | шигырь, повесть, роман |
| Иҗат итү теле: | татар |
| Бүләкләр: |  ТР атказанган мәдәният хезмәткәре Рафаил Төхфәтуллин премиясе |
Тәрҗемәи хәле
үзгәртү1953 елның 15 июнендә Татарстан АССР Мөслим районы Яңа Сәфәр авылында колхозчы гаиләсендә туган. Туган авылында башлангыч, Баек авылында сигезьеллык мәктәпне тәмамлаган. Техник училищеда укып, механизатор һөнәрен үзләштерә. Армиядә хезмәт итә. Уфа шәһәре партия комитеты каршында марксизм-ленинизм университетын (1980), читтән торып Әндиҗан электромеханика техникумын (1986) тәмамлый. Ташкент политехника институтының (2017 елдан Ислам Кәримов исемендәге Ташкент дәүләт техник университеты) төзелеш факультетында инженер белгечлеге ала (1993) [1].
1974―1992 елларда Таҗикстан ССР Ленинабад шәһәре «Облколхозстрой» оешмасында, Башкортстан АССРда: Уфада «Бөтенсоюз комсомол төзелеше» дип игълан ителгән биохимия комбинатында һәм Благовещенск арматура заводында, Үзбәкстан ССР Нәмәнгән шәһәре «Облводхоз» сәнәгать берләшмәсендә эшли.
1995 елдан Әлмәттә. 1995―1999 елларда «Путь Ильича» җитештерү кооперативында инженер-төзүче, 2000―2002 елларда Әлмәт шәһәр хакимиятенең капиталь төзелеш идарәсендә әйдәп баручы инженер, 2002―2003 елларда «Татойлгаз» ЯАҖ техник бүлек җитәкчесе, 2006―2009 елларда төзелеш надзоры инспекциясенең көньяк-көнчыгыш идарәсендә әйдәүче белгеч-эксперт, 2009―2012 елларда Түбән Кама ТАНЕКО ААҖ техник надзор бүлегендә инженер, 2014 елдан Әлмәттә «Западный» ҖЧҖ директорының капиталь төзелеш буенча урынбасары булып эшли. Татарстанның көньяк-көнчыгыш төбәгендә эре төзелеш объектларын торгызуга зур өлеш кертә[2].
Иҗаты
үзгәртүҮзенең төп эше белән беррәттән иҗат белән дә шөгыльләнә. Яшьтән шигърият белән мавыга, әкренләп проза жанрына күчә. Баштарак русча яза, аннары татарча иҗат итә башлый. 2003 елда Татарстан Язучылар берлегенең Әлмәт язучылар оешмасына җитәкче (җаваплы секретарь) итеп сайлана. Республиканың нефть чыккан төбәгендәге 7 административ районны (Әлмәт, Азнакай, Баулы, Бөгелмә, Лениногорск, Мөслим, Сарман) эченә алган оешмада З. М. Дәүләтов тормышын иҗат белән бәйли. 2001 елда (Казан: «Рухият» нәшрияты) чыккан «Син дә шагыйрь, мин дә шагыйрь», «Мәхәббәтнамә» (К., 2005) дигән күмәк җыентыкларда шигырьләре урын ала. Публицистик һәм әдәби язмалары «Әлмәт таңнары», «Знамя труда», «Мәдәни Җомга», «Ватаным Татарстан» газеталарында, «Сөембикә», «Идел» (2002, 2004), «Казан утлары» (2003), «Стратегия успеха» (2005), «Элита Татарстана» журналларында басыла. «Яшәү яме» исемле документаль романында (К., 2008(тат.), 2009(рус.)) төзүче образын калку итеп күрсәтә.
Китаплары
үзгәртү- Тормыш дигән язмыш
- Уйландырган заман
- Төзәлмәс яра, 2 кисәк
- Яшәү яме
- Сайланма әсәрләр 3 т.
Гаиләсе
үзгәртүХатыны Әлфия, рус теле укытучысы. Ике улы нефтьче.
Бүләкләре, мактаулы исемнәре
үзгәртү- 2006 ― ТР атказанган мәдәният хезмәткәре
- 2012 ― Рафаил Төхфәтуллин премиясе
- 2013 ― «Фидакарь хезмәт өчен» медале ― республиканың төзелеш тармагын үстерүгә керткән өлеше һәм намуслы хезмәте өчен[3]
- 2013 ― «Әлмәтнең 60 еллыгы» мактаулы билгесе
Искәрмәләр
үзгәртү- ↑ Районыбызның хөрмәтле кешеләре. Давлитов Зуфар Мирхайдарович. 2021 елның 12 апрель көнендә архивланган. Мөслим районы рәсми поралы(рус.)
- ↑ Т. Гимадиева. Давлитов Зуфар Мирхайдарович. Альметьевская энциклопедия(рус.)
- ↑ Признание заслуг. 2021 елның 12 апрель көнендә архивланган. «Республика Татарстан», 29.06.2013(рус.)
Әдәбият
үзгәртү- Ф. Н. Баһаутдинов. Зөфәр Дәүләтов // Ф. Н. Баһаутдинов. Без Мөслим балалары. К.: «Идел-Пресс», 2006, 492-494нче бит. ISBN 5-85247-005-4
Сылтамалар
үзгәртү- Зөфәр Дәүләтов. ТР Язучылар берлеге
- Т. Гимадиева. Давлитов Зуфар Мирхайдарович. Альметьевская энциклопедия(рус.)
- Зуфар Давлитов в июне отметит свое 60-летие. 2021 елның 12 апрель көнендә архивланган. «Элита Татарстана», 26.05.2013
Моны да карагыз
үзгәртү| Элгәре: Разим Вәлиуллин |
Әлмәт язучылар оешмасы җитәкчесе 2003 — 2006 |
Аннары: Данил Салихов |
