Гөлсем Камская

Гөлсем Сәйфулла кызы Камская (Ильясова) (25 март 1901(1901-03-25), Казан, Россия империясе — 8 декабрь 1975(1975-12-08) (74 яшь), Казан, РСФСР, СССР) — күп татар театрларында эшләгән талантлы артистка.

Ватандашлык	СССР
Туу датасы	25 март 1901(1901-03-25)
Туу урыны	Казан, Россия империясе
Үлем датасы	8 декабрь 1975(1975-12-08) (74 яшь)
Үлем урыны	Казан, РСФСР, СССР
Ире яки хатыны	Гали Ильясов
Балалар	Дилүс Ильясов
Һөнәр төре	театр актеры
Эш урыны	Аң, Әстерхан дәүләт татар драма театры, Мәскәү үзәк татар эшче театры һәм Галиәсгар Камал исемендәге Татар театры
Бүләкләр

Тәрҗемәи хәле

Гөлсем Камская 1901 елның 25 мартында Казан шәһәрендә туа. Аның сәхнә эшчәнлеге 1919 елда башлана. Г. Камская Казан, Әстерхан һәм Мәскәү татар театрларында хезмәт итә, ә 1933 елдан ул – Г. Камал исемендәге Татар дәүләт академия театры артисткасы.

Театр эшчәнлеге

Ярты гасырлык сәхнә эшчәнлеге чорында ул татар, рус һәм дөнья драматургиясе әсәрләре буенча эшләнгән спектакльләрдә төрле характердагы дистәләрчә образлар иҗат итә.

Аның героиняларының сәхнәдәге тормышы һәрвакыт тирән фикерле, нечкә психологизм, милли үзенчәлекле булулары белән аерылып тора. Нәгыймә (“Банкрот”, Галиәсгар Камал), Галчиха (“Гаепсездән гаеплеләр”, А.Островский), Маһинур (“Миңлекамал”, М.Әмир), Блюм (“Тормыш яңадан башлана”, В.Собко), Гөлниса (“Шомлы көннәр”, Таҗи Гыйззәт), Сәхилә (“Х.Насретдин”, Нәкый Исәнбәт), Сабира (“Татар хатыны ниләр күрми”, Галимҗан Ибраһимов) һәм башка ул уйнаган рольләр татар театр сәнгатен үстерүдә билгеле бер өлеш була, артисткага шөһрәт китерә.

Г. Камская театрның җәмәгать эшләрендә актив катнаша, яшь артистлар белән үзенең бай иҗат тәҗрибәсен уртаклаша.

Бүләкләр

Театр сәнгатен үстерүдәге зур хезмәтләре өчен Гөлсем Камскаяга РСФСРның атказанган һәм Татарстанның халык артисткасы дигән мактаулы исемнәр бирелә.

Гаилә хәле

• Ире Гали Ильясов, драма актеры. Балалары Дэллюс (1922-1981), Әсфән.