Җәүдәт Дәрзаман

Җәүдәт Дәрзаман, Җәүдәт Харис улы Дәрзаманов (1945 елның 13 октябре, ССРБ, РСФСР, ТАССР, Лениногорск районы, Сугышлы — 2019 елның 25 феврале, РФ, ТР, Казан) — күренекле татар шагыйре, язучы, журналист. Ш. Бикчурин (2002) һәм С. Сөләйманова (2009) исемендәге премияләр лауреаты. 1982 елдан ССРБ Язучылар берлеге әгъзасы.

Җәүдәт Дәрзаман
Туган телдә исем	Җәүдәт Харис улы Дәрзаманов
Туган	13 октябрь 1945(1945-10-13) ССРБ, РСФСР, ТАССР, Лениногорск районы, Сугышлы авылы
Үлгән	25 февраль 2019(2019-02-25) (73 яшь) РФ, ТР, Казан
Әлма-матер	Казан (Идел буе) федераль университеты
Һөнәре	журналист, шагыйрь
Җефет	Тәслимә
Балалар	ике кызы
Бүләк һәм премияләре	Шамил Бикчурин премиясе (2002) Саҗидә Сөләйманова премиясе (2009) Абдулла Алиш премиясе

Биография

Җәүдәт Дәрзаман Лениногорск районының Сугышлы авылында туа. 1972 елда Казан дәүләт университетын тәмамлый. Татарстан радиокомитетында – редактор, 1987-1994 елларда «Ялкын» журналы редакциясендә баш мөхәррир була. Татарстан радиосында әдәбият – сәнгать тапшыруларының шеф мөхәррире булып эшли.

Җәүдәт Дәрзаманның беренче шигырьләре район газетасында, «Яшь ленинчы»да дөнья күрә. 1975 елда – «Илтабар» исемле әкиятләр җыентыгы, 1977 елда «Солдат булдым» дигән шигырьләр китабы басылып чыга. Соңрак аның «Гөлназ мәктәпкә бара», «Безнең әлифба», «Күзле кычыткан», һ.б. шундый егермеләп китабы дөнья күрде. Җәүдәт Дәрзаман шигырьләре мәктәп дәреслекләренә дә кертелгән.

2019 елның 25 февралендә 14 ел авырудан соң дөнья куя. Казанның мөселман зиратында җирләнгән. Каберташының бер ягында шигыре язылган: "Җирдә янгын, яшен күкләрендә, //Ә җаныма шундый салкын минем. //Мең кат үлеп, мең кат терелерлек - //Сират күперен кичә халкым минем.//Җәүдәт Дәрзаман"

Сылтамалар

• Белем.ру 2016 елның 11 март көнендә архивланган.
• Тукай музеенда язучы Җәүдәт Дәрзаманга багышланган кичә була