Ağa bazar

Ağa bazar — 10-15 yözlärdä Bolğar şähäreneñ zur säwdä häm hönärçelek bistäse. Şähärdän 6 çaqrım tönyaq-könbatıştaraq, İdelneñ sul yarı belän Mälänä yılğaçığı arasında urnaşqan bula. İdel buyı Bolğar däwläteneñ ere säwdä, hönärçelek häm mädäniät üzäge.

Ağa bazar (Rodionov räseme, 1981)

Ağa bazar (Baqıy Urmançe räseme, 1970)

1431 yılda kenäz Födor Pöstrıy citäkçelegendä Bolğarğa yaw belän kilgän rus ğäskäre talap häm cimerep kitkännän soñ, taşlandıq xälgä kilä. Xärabäläre İdelneñ sul yarında, xäzerge Bolğar şähäre yänäşäsendä. Arxeologik qazular barışında ayırım yortlar, xucalıq qorılmaları, hönärçelek ostaxanäläre (mögez-söyäk eşkärtü, metall qoyu, çülmäk yasaw h.b.) qaldıqları, törle xucalıq äyberläre, şulay uq aqçalar, çit illärdän kiterelgän eşlänmälär tabıla. Ağa bazar xärabälären 1852 dä İ.N. Berezin, 1877 dä A.A. Spitsın, 1893 tä P.A. Ponomaröv, 1952-54 tä B.B. Jiromskiy belän K.A. Smirnov tikşerälär. 1955-57 yıllarda Kuybışev susaqlağıçı astında qala.

Monı da qarağız

• Bolğar çigä asılması
• Bolğar
• Bolğar-Rus kileşüläre
• İdel buyı Bolğar däwläte
• Böyek Bolğar ile
• İdel Bolğarı ictimaği-säyäsi tözeleşe
• Baqıy Urmançe
• Möxämmät-Ämin xan

Ädäbiät

• Жиромский Б.Б. Ага-Базар // Материалы и исслед. по археологии. 1954. №42.
• Город Болгар. Очерки истории и культуры. М., 1987.

Tışqı sıltamalar

• Bolğar däwläte
• Ага-Базар. Tatarica