Каравылчы (уен)

Каравылчы — татар халык уены.

Каравылчы
Уенчылар саны	күп
Уйнау урыны
Физик активлык	түбән

Уйнау тәртибе

Ике рәт утыргычлар тезеп чыгалар. Утыргычларның саны уйнаучылардан берәү ким булсын. Җырга оста бер кеше каравылчы итеп сайлана. Ул утыргычларны уратып басып йөри. Башка балалар, аның артыннан ияреп, җырлап йөриләр:

Ярты төн булды,

Бар дөнья тынды.

Бар, тиз кайтыгыз!

Бар, тиз ятыгыз!

Кайтмаганнарны каравыл кертмәс,

Бар, тиз кайтыгыз,

Тизрәк ятыгыз!

Каравылчы йөри. Аягы белән тыпылдатып куя, әйләнә, боргалана, сикергәли, төрлечә хәрәкәтләр ясаштыра. Башка балалар аның артыннан, ул ни кыланса шуны эшләп, ияреп йөриләр. Алар җырлагач, каравылчы дәвам итә:

Кайтмаганнарны өенә кертмим,

Бар, тиз кайтыгыз, тизрәк ятыгыз! —

ди дә таягы белән урындык аягына шакылдата. Бар да ашыгып урындыкларга утыралар. Урындыксыз калган баланы каравылчы бер читкә илтеп куя. Урындыгын ала. Уенны бер кеше калганчы дәвам иттереп, аны каравылчы итәләр.

Чыганаклар

• Татар балалар фольклоры./Төзүчесе Рәшит Ягъфәров. — Казан: «Раннур» нәшрияты, 1999.