Нурулла Абдулин

Абдуллин Нурулла Гайнулла улы — нефтьче-геолог.

Белем алуы

1931 елның 6 декабрендә Хәсәншәех авылында туган. 1950 елда Балтач урта мәктәбен тәмамлый. Укуын Казан дәүләт университетының туфрак-геология факультетында дәвам итә, шушында ук аспирантурада укый. 1965 елда диссертация яклап геология-минералогия фәннәре кандидаты гыйльми дәрәҗәсе ала.

Фән өлкәсендә эшчәнлеге

Н. Абдуллин 1957 елда Бөгелмә шәһәрендәге Татарстан нефть-фәнни тикшеренү һәм проектлау институтына эшкә килә. 1970-1993 елларда — институтның разведка һәм эзләнүләр геологиясе бүлеге начальнигы. Ул киң колачлы эш фәнни эш алып бара. Фәнни эшчәнлеге яңа нефть ятмаларын эзләү һәм бәяләү белән бәйле.

Н. Абдуллин атаклы Сабанчы нефть ятмаларын ачучыларның берсе (1985). Татарстандагы һәм Башкортстандагы башка нефть ятмаларын ачуда актив катнаша. Ул шулай ук Идел-Урал төбәге нефть һәм газ ятмалары картасын төзүдә катнаша (1966).

Дәрәҗәле исемнәре

Татарстан нефть ятмаларын үзләштерүдәге хезмәтләре өчен 1977 елда академик И.М. Губкин исемендәге премиягә лаек булды. Ул СССРның нефть сәнәгате отличнигы. 1992 елда Татарстан Республикасының атказанган нефтьчесе исеме бирелде.

Галим Бөгелмә шәһәрендә яши, фәнни эшчәнлеген дәвам итә.

Чыганаклар:

Балтач энциклопедиясе, I том, 2006

Балтач энциклопедиясе, II том, 2010