Габдулла Габбасов

Габбасов Габдулла Закир улы — хәрби хезмәткәр, полковник.

Кызыл һәм акгвардияче Габбасовлар

Түнтәр авылында 1916 елның 9 февралендә туган. Түнтәрдә тугыз сыйныф укыганнан соң Яңгул урта мәктәбендә укып урта белем ала. 1932-1933 елларда Казанда Совет хокук институтында укый. Шул чорларда ук җәйге сезонда туган авылында яңа оешып килүче колхозда кыр эшләрендә катнаша.

1933 елда туганнары чакыруы буенча Урта Азиягә китә. Башта прокуратура, эчке эшләр органнарында эшли. 1940 елда Дәүләт Куркынычсызлыгы комитетының икееллык мәктәбен тәмамлый. Шуннан соңгы 25 еллык гомере тышкы разведка хезмәте белән бәйле.

Г.Габбасов Бөек Ватан сугышында катнаша, Иранда хезмәт итә. Аңа Урта Азиянең күп шәһәрләрендә дә эшләргә туры килә. Үзбәк, төркмән, әзербайҗан, фарсы телләрен камил үзләштерә. 1957 елдан Татарстан Республикасында Дәүләт Куркынычсызлыгы органнарында эшли.

1965 елда авыру сәбәпле аңа әлеге хезмәт белән хушлашырга туры килә. Әмма гомумән хезмәт белән түгел—тагын 28 ел дәвамында Казан электрон исәпләү машиналары заводының саклау хезмәте начальнигы булып эшли ул.

Г.Габбасов хөкүмәтебезнең югары бүләкләренә лаек була. Ул икенче дәрәҗә Ватан сугышы, Кызыл Йолдыз орденнары, 16 медаль кавалеры.

Якташыбызның хезмәт юлын аның балалары дәвам итә. Олы улы Фирүс—Федераль Куркынычсызлык хезмәте полковнигы, икенче улы Фирдәвес—хирург, кызы юрист. Алар сафына хәзер берәм-берәм югары белем алып оныклары басып килә.

ЧыганакларҮзгәртү

  • Р.Зарипов. Тирән тамырлы Түнтәрем. 2008.
  • Р.Зарипов. Бакыйлыкка күчкән әби-бабаларыбыз рухына бер дога. 2021.
  • Г.Мөхәммәтшин. Балтач энциклопедиясе (Р.Зарипов туплап биргән мәгълүмат). 1 том. 2006.