Павел Саначин

Павел Саначин, Павел Алексей улы Саначин (рус. Павел Алексеевич Саначин, 1918 елның 12 июле, РСФСР, Казан губернасы, Мамадыш өязе, Бөрсет — 1984 елның 5 мае, ССРБ, РСФСР, ТАССР, Казан) — РСФСР атказанган архитекторы (1975), Бөек Ватан сугышында катнашучы. ТАССР Төзелеш буенча дәүләт комитеты (Госстрой) рәисе (1979—1984).

Павел Саначин
Туган телдә исем	Павел Алексеевич Саначин
Туган	12 июль 1918(1918-07-12) РСФСР, Казан губернасы, Мамадыш өязе, Бөрсет
Үлгән	5 май 1984(1984-05-05) (65 яшь) ССРБ, РСФСР, ТАССР, Казан
Күмү урыны	Арча зираты
Яшәгән урын	Текә тыкрык (Казан) Зур Кызыл урам, 57Б[d]
Ватандашлыгы	РСФСР РСФСР→ ССРБ ССРБ
Әлма-матер	Казан авиация-техника көллияте һәм Казан дәүләт архитектура-төзелеш университеты
Һөнәре	архитектор
Балалар	улы Сергей (1948), архитектор
Бүләк һәм премияләре	РСФСР атказанган архитекторы

Тышкы рәсемнәр
	П. А. Саначин проектлаган һәм төзегән Казан биналары.

Тәрҗемәи хәле

1918 елның 12 июлендә Казан губернасы Мамадыш өязе (хәзерге Татарстанның Мамадыш районы) Бөрсет бистәсендә урманчы гаиләсендә туган. 1925 елны Саначиннар гаиләсе Казанга күченә. Казанның 1нче урта мәктәбендә, электротехника һәм авиация техникумнарында укый. 1939 елда «инженер-төзүче» белгечлеге буенча Казан коммуналь һәм сәнәгый төзелеш инженерләре институтын (соңрак КИСИ, төзелеш академиясе) тәмамлый. Уку йортын тәмамлагач, Казан авиация заводын төзүче 14нче трестта эшли башлый. Бераздан хәрби хезмәткә чакырыла.

Бөек Ватан сугышы елларында гаскәрне елгаларны кичү өчен күперләр белән тәэмин итүче инженер бүлгесендә хезмәт итә. Сугыш юлларын 1942 елда взвод командиры булып башлап, Праһада батальон командиры урынбасары булып, капитан дәрәҗәсендә тәмамлый. III дәрәҗә Богдан Хмельницкий ордены, Ватан сугышы ордены, Кызыл Йолдыз ордены, медальләр белән бүләкләнә.

1946 елда хәрби хезмәттән азат ителгәч, Казанга кайта һәм ТАССР министрлар шурасы каршындагы архитектура эшләре буенча идарәгә эшкә урнаша. 1952—1962 елларда «Татпроект» проектлау конторасы баш архитекторы. Бер үк вакытта 1956—1962 елларда ССРБ архитекторлар берлегенең Татарстан оешмасы идарәсе рәисе. КИСИда студентларга белем бирә. 1962—1979 елларда ТАССР министрлар шурасы төзелеш һәм архитектура эшләре буенча идарәсе (1979 елдан ТАССР төзелеш эшләре буенча дәүләт комитеты, рус. Госстрой) башлыгы. Вафатына кадәр әлеге комитет башлыгы вазифасында була.

Төзегән проектлары

Казанның Үзәк стадионы

П. А. Саначин җитәкчелегендә Яшел Үзән (1948—1953), Бөгелмә (1950—1956), Лениногорск (1950, автордаш Р. М. Мортазин), Чистай (1951, автордаш Р. М. Мортазин), Әлмәт (1951, автордаш Р. М. Мортазин), Яр Чаллы, Азнакай шәһәрләре, Казанның үзәге һәм районнарын төзү генераль планнары әзерләнә һәм тормышка ашырыла. Саначинның төзегән проектлары исәбендә: «Татэнерго» бинасы (1953), ТАССР ВДНХ комплексы (1955—1957), ветеринария институты биналары (1955—1961, Г. И. Солдатов белән берлектә), Казанның Үзәк стадионы (1960), КПССның Татарстан өлкә комитеты бинасы (1962), Пушкин урамы буенча 3нче, 5нче, 7нче санлы йортлар һ. б.

Хәтер

• XX гасырда Казанда архитекторлар хөрмәтенә аталган ике генә урам була: Баженов һәм Воронихин урамнары. 2004 елда Зур Кызыл урамга чыгучы, 1953—1984 елларда архитектор яшәгән тыкрыкның исеме Саначин тыкрыгы итеп үзгәртелә.
• Яр Чаллыда Комсомол районы ЗЯБ бистәсендә Чаллы елгасы Чулманга кушылган урындагы урамга исеме бирелә.

Бүләкләре, мактаулы исемнәре

• Богдан Хмельницкий ордены
• Ватан сугышы ордены
• Кызыл Йолдыз ордены
• 1975 — РСФСР атказанган архитекторы

Чыганаклар

1. Татарский энциклопедический словарь. Казань: Институт татарской энциклопедии АН РТ, 1999. ISBN 0-9530650-3-0

Сылтамалар

• Саначин Павел Алексеевич. КГАСУ музее сайты